നാളെ തിരുവല്ല ബൈപ്പാസ് തുറക്കും
തിരുവല്ല ബൈപ്പാസ് നാളെ തുറക്കും
WEB Desk 
തിരുവല്ല : പതിറ്റാണ്ടുകൾ നീണ്ട കാത്തിരിപ്പിനൊടുവിൽ തിരുവല്ല ബൈപ്പാസ് പൂർണമായും തുറക്കുന്നു. ഞായറാഴ്ച 11.30-ന് മന്ത്രി ജി.സുധാകരൻ ഉദ്ഘാടനം നിർവഹിക്കും. മാത്യു ടി. തോമസ് എം.എൽ.എ. അധ്യക്ഷത വഹിക്കും. എം.സി.റോഡിൽ ബൈപ്പാസ് ചേരുന്ന രാമൻചിറയിലാണ് ഉദ്ഘാടന ചടങ്ങ്. ബൈപ്പാസിന്റെ മഴുവങ്ങാട് മുതൽ മല്ലപ്പള്ളി റോഡുവരെയുള്ള ഭാഗം കഴിഞ്ഞവർഷം ഉദ്ഘാടനം ചെയ്തിരുന്നു. 2013-ൽ കരാർ വെച്ചുതുടങ്ങിയ പണികളാണ് പ്രതിസന്ധികളിലൂടെ കടന്ന് ഇപ്പോൾ പൂർത്തീകരിക്കുന്നത്.
പുതിയ വഴി
എം.സി.റോഡിൽ ചെങ്ങന്നൂർ ഭാഗത്തുനിന്നു വരുമ്പോൾ മഴുവങ്ങാട് ചിറയിൽനിന്നുമാണ് ബൈപ്പാസ് തുടങ്ങുന്നത്. രാമൻചിറയിൽവെച്ച് എം.സി.റോഡിൽ ചേരും. 2.3 കിലോമീറ്റർ ദൂരം. വൈ.എം.സി.എ., രാമൻചിറ എന്നിവിടങ്ങളിൽ രണ്ട് മേൽപ്പാലങ്ങൾ. മഴുവങ്ങാട് ചിറ, പുഷ്പഗിരി റോഡ്, ബി.വൺ റോഡ്, റെയിൽവേസ്‌റ്റേഷൻ റോഡ്, മല്ലപ്പള്ളി റോഡ്, രാമൻചിറ എന്നിവിടങ്ങളിലായി ആറ് ട്രാഫിക് സിഗ്നൽ കവലകൾ. മഴുവങ്ങാട് നിന്നു തിരുവല്ല നഗരം വഴി രാമൻചിറയിലെത്താൻ 2.4 കി.മീ.യാണ് ദൂരം. നഗരഹൃദയത്തോട് ചേർന്നുപോകുന്നതിനാൽ ബൈപ്പാസ് എത്രമാത്രം യാത്രാക്കുരുക്കിന് പരിഹാരമാകുമെന്ന് കാത്തിരുന്ന് കാണണം.
നാൾവഴി
എം.സി.റോഡിലെ വലിയ പട്ടണങ്ങളിൽ ഒന്നായ തിരുവല്ലയെ ഗതാഗതക്കുരുക്കിൽനിന്ന് മോചിപ്പിക്കാൻ 1996-ലാണ് ബൈപ്പാസ് എന്ന ആശയം ചർച്ചചെയ്യപ്പെട്ട് തുടങ്ങിയത്. 2013-ൽ 31.82 കോടി രൂപയ്ക്ക് കരാർ ഉറപ്പിച്ചു. 2014 ജനുവരിയിൽ പണികൾ ഉദ്ഘാടനം ചെയ്തു.
ഏറ്റെടുക്കൽ നടപടികൾ പൂർത്തീകരിക്കാതെയാണ് റോഡുപണി തുടങ്ങിയത്. 2017 മധ്യത്തോടെ ആദ്യകരാറുകാരൻ പണി ഉപേക്ഷിച്ചു. മഴുവങ്ങാട് ചിറയിൽ പി.വി.ഡി. സംവിധാനത്തിലുള്ള റോഡുപണി, വൈ.എം.സി.എ. ഭാഗത്തെ ഫ്ളൈഓവർ, മുല്ലേലിത്തോട് പാലം എന്നിവയാണ് ഈ ഘട്ടത്തിൽ പൂർത്തീകരിച്ചത്.
കരാർ ഉപേക്ഷിക്കപ്പെട്ടതോടെ പുതിയ പദ്ധതിയായി വീണ്ടും ബജറ്റ് ചെയ്യേണ്ട സ്ഥിതിയായി. ചീഫ് സെക്രട്ടറി അധ്യക്ഷനായ സംസ്ഥാനതല സ്റ്റിയറിങ് കമ്മിറ്റി പലവട്ടം ചേർന്നാണ് വീണ്ടും പദ്ധതിക്ക് പച്ചക്കൊടി കാട്ടിയത്. അവശേഷിച്ച പണികൾക്ക് 37 കോടി രൂപയ്ക്ക് പുതിയ കരാർ വെച്ചു.
ആദ്യ കരാറുകാരന് 20 കോടി രൂപയോളം നൽകിയിരുന്നു. ഫലത്തിൽ 31.82 കോടി രൂപ കണക്കാക്കി തുടങ്ങിയ പണികൾ എട്ടുവർഷമെടുത്ത് തീരുമ്പോൾ 57 കോടി രൂപയോളം ചെലവായി. 2019-ലാണ് അടുത്ത കരാർവെച്ച് പണികൾ തുടങ്ങിയത്. ഒൻപത് മാസമായിരുന്നു കാലാവധി. വെള്ളപ്പൊക്കം മൂലം ആദ്യം തടസ്സപ്പെട്ട പണികൾ പിന്നീട് ലോക്ഡൗൺമൂലം നീണ്ടു.പൂർത്തിയാകുന്നത് കരാർ വെച്ചതിന്റെ എട്ടാംവർഷം, തുക ഇരട്ടിയോളമായി
