താഴ്ന്ന സ്ഥലങ്ങൾ മണ്ണിട്ട് ഉയർത്തുന്നു

Feb 13, 2021 - 08:11

റാന്നി : റാന്നി ടൗണിൽ വലിയ തോടിനോട് ചേർന്ന പ്രദേശങ്ങളിലെ താഴ്ന്ന സ്ഥലങ്ങൾ മണ്ണിട്ട് ഉയർത്തുന്നത് ഇട്ടിയപ്പാറയിലെ വ്യാപാരികൾക്കും സമീപവാസികൾക്കും ഭയവും ആശങ്കയും ഉണ്ടാക്കുന്നു. വയലുകളും താഴ്ന്ന സ്ഥലങ്ങളും നികത്തുമ്പോൾ മഴക്കാലത്ത് വലിയതോടിന്റെ സമീപ പ്രദേശങ്ങൾ വേഗത്തിൽ വെള്ളത്തിനടിയിലാവും. ഇട്ടിയപ്പാറയിൽ വലിയ തോടിനോട് ചേർന്ന് ഏക്കർ കണക്കിന് താഴ്ന്ന പ്രദേശങ്ങളുണ്ടായിരുന്നു. എന്നാൽ അവയെല്ലാം മണ്ണിട്ട് ഉയർത്തുന്നതാണ് വ്യാപാരികളിൽ ഏറെ ഭീതിയുണ്ടാക്കുന്നത്. വലിയ തോടിന്റെ വീതികുറഞ്ഞതാണ് പ്രധാന പ്രശ്‌നം. ഇപ്പോൾ ഇതുകൂടിയായപ്പോൾ പ്രശ്‌നം രൂക്ഷമാവുകയാണ്.

സാധാരണ മഴക്കാലത്ത് ചെറിയ വെള്ളപ്പൊക്കമൊന്നുമുണ്ടായാൽ ടൗണിനെ സാരമായി ബാധിച്ചിരുന്നില്ല. എന്നാൽ ഇപ്പോൾ ചെറിയ വെള്ളപ്പൊക്കമുണ്ടാവുമ്പോൾ പോലും ഇട്ടിയപ്പാറയിലൂടെ കടന്നുപോകുന്ന വലിയതോട് കവിഞ്ഞ് വെള്ളം ടൗണിലൂടെ ഒഴുകുന്നു.

വ്യാപാരികളുടെ നിരന്തര ആവശ്യത്തെ തുടർന്ന് വലിയതോട് വൃത്തിയാക്കാൻ ജില്ലാ കളക്ടർ കഴിഞ്ഞ വർഷം നിർദേശം നൽകിയിരുന്നു. ഇത് ഭാഗികമായി മാത്രമാണ് നടപ്പായത്. ഇപ്പോൾ കെ.എസ്.ആർ.ടി.സി. ബസ് സ്റ്റാൻഡിന്റെ പിൻഭാഗത്തുള്ള താഴ്ന്ന സ്ഥലം കുറേക്കൂടി മണ്ണിട്ട് ഉയർത്തിവരുകയാണ്. ഇടത്താവളം നിർമിക്കുന്നതിനോട് ചേർന്നാണിത്. പത്തടിയിലധികമാണ് മണ്ണിട്ട് ഉയർത്തുന്നത്. സംസ്ഥാന പാത വികസനം, ഗവ.ഐ.ടി.ഐ. നിർമാണം എന്നിവിടങ്ങളിൽനിന്ന് നീക്കംചെയ്യുന്ന മണ്ണാണ് പഴവങ്ങാടി പഞ്ചായത്ത് വക സ്ഥലത്ത് തള്ളി ഇവിടെ നികത്തുന്നത്. ഇത് ഭാവിയിൽ ഏറെ അപകടം വരുത്തുമെന്ന് സമീപവാസികളും വ്യാപാരികളും ചൂണ്ടിക്കാട്ടുന്നു. വെള്ളപ്പൊക്ക സമയത്ത് വലിയതോട് കവിഞ്ഞ് ഈ ഭാഗമെല്ലാം നിറഞ്ഞശേഷമേ ടൗണിലേക്ക് വെള്ളമെത്തിയിരുന്നുള്ളൂ. എന്നാൽ ഇവിടെയെല്ലാം നികത്തുന്നതോടെ വലിയ തോട് കവിഞ്ഞാലുടൻ ടൗണിലെ കടകൾക്ക് ഭീഷണിയാവും.

2018-ലെ പ്രളയത്തോടെ ശരിക്കും റാന്നിയിലെ വ്യാപാരികൾ തകർന്നുപോയി. ഇനി ചെറിയൊരു വെള്ളപ്പൊക്കം പോലും അവർക്ക് ചിന്തിക്കാനാവില്ല. മണ്ണിട്ട് ഉയർത്തി വികസനം വരട്ടെ എന്നാഗ്രഹിക്കുന്നവരേറെയുണ്ട്. കാടുമൂടികിടന്ന ഭാഗം മണ്ണിട്ട് മൂടി വികസനം എത്തട്ടെ എന്നാണിവരുടെ കാഴ്ചപ്പാട്. എന്നാൽ, ഇതിനോട് ചേർന്നുള്ളവർ വികസനത്തിന് എതിരല്ലെങ്കിലും അതിനേക്കാളവർ പ്രളയത്തെ ഭയക്കുന്നു.