ഒരു സാധാരണ വീട്ടമ്മ
മറഞ്ഞിരുന്ന് ആക്രമിക്കുന്നവര്‍ മുഖമില്ലാത്തവര്‍, ഞാന്‍ ഒരു സാധാരണ വീട്ടമ്മ
admin 
സെക്രട്ടേറിയറ്റിന് മുന്നില്‍ ലാസ്റ്റ് ഗ്രേഡ് റാങ്ക് ഹോള്‍ഡേഴ്സിന്റെ സമരത്തിനിടെ സമരത്തെ അഭിസംബോധന ചെയ്ത ഉദ്യോഗാര്‍ഥി ലയാ രാജേഷും സുഹൃത്ത് ഡെന്‍സി റിത്തുവും മാറിനിന്ന് പൊട്ടിക്കരയുന്നു
''സാമൂഹികമാധ്യമങ്ങളില്‍ മറഞ്ഞിരുന്ന് ആക്രമിക്കുന്നത് മുഖമില്ലാത്തവരാണ്. ഞാനൊരു സാധാരണ വീട്ടമ്മ മാത്രമാണ്. എന്നെ ക്രൂരമായി ആക്രമിക്കുന്നവര്‍ സെക്രട്ടേറിയറ്റിന് മുന്നിലേക്ക് വരൂ. എല്ലാ ചോദ്യങ്ങള്‍ക്കും മറുപടിനല്‍കാം. റാങ്ക് ഹോള്‍ഡേഴ്സ് സമരത്തില്‍ പങ്കെടുക്കാനാണ് ഞങ്ങള്‍ വന്നത്.
സൈബര്‍ സെല്ലില്‍ പരാതി നല്‍കിയാലും ഒന്നും നടക്കില്ല. ലാസ്റ്റ് ഗ്രേഡ് റാങ്ക് പട്ടികയിലുള്ള എല്ലാവര്‍ക്കും ജോലി ലഭിക്കുംവരെ സമരപ്പന്തലിലുണ്ടാകും. എന്നെ അറിയുന്നവര്‍ പിന്തുണ നല്‍കുന്നുണ്ട്, വീട്ടുകാരും, അതുമതി'' -സെക്രട്ടേറിയറ്റ് സമരത്തിനിടെ ഒപ്പമുണ്ടായിരുന്ന രണ്ടുപേര്‍ മണ്ണെണ്ണയൊഴിച്ച് ആത്മഹത്യാശ്രമം നടത്തിയതു കണ്ട് കരഞ്ഞതിന് സൈബര്‍ ആക്രമണത്തിനിരയായ തൃശ്ശൂര്‍ സ്വദേശി ലയാ രാജേഷ് 'മാതൃഭൂമി'യോട് പറഞ്ഞു.
എനിക്ക് ഇഷ്ടമുള്ള ആളുകളെയാണ് ഫെയ്സ്ബുക്കില്‍ ഫോളോ ചെയ്യുന്നതും ഷെയര്‍ ചെയ്യുന്നതും. സോണിയാഗാന്ധിയുടെയും ഇന്ദിരാഗാന്ധിയുടെയും കാര്യങ്ങള്‍ ഷെയര്‍ ചെയ്തിട്ടുണ്ട്. തൃശ്ശൂര്‍ കോര്‍പ്പറേഷനില്‍ സി.ഡി.എസ്. അംഗമായ ഞാന്‍ ഇന്ദിരാഗാന്ധിയെ അത്രയേറെ ഇഷ്ടപ്പെടുന്നു. ആരെയും പേടിച്ച് ഓടാനോ, പിന്മാറാനോ തയ്യാറല്ല.
