ജില്ലാ കൃഷിവിജ്ഞാനകേന്ദ്രത്തിലെ : കാർഷികവിളകളും നടീൽ വസ്തുക്കളും കാട്ടുപന്നികൾ നശിപ്പിച്ചു
ജില്ലാ കൃഷിവിജ്ഞാനകേന്ദ്രത്തിലെ : കാർഷികവിളകളും നടീൽ വസ്തുക്കളും കാട്ടുപന്നികൾ നശിപ്പിച്ചു
WEB Desk 
പത്തനംതിട്ട : കോയിപ്രം വള്ളിക്കാലയിലുള്ള ജില്ലാ കൃഷിവിജ്ഞാനകേന്ദ്ര ഫാമിലെ കാർഷികവിളകളും നടീൽ വസ്തുക്കളും ബുധനാഴ്ച രാത്രി കാട്ടുപന്നിക്കൾ നശിപ്പിച്ചു. അടുത്ത സീസണിലെ വിതരണത്തിന് തയ്യാറാക്കി നേഴ്‌സറിയിൽ പരിചരിച്ചുകൊണ്ടിരുന്ന തേക്ക്, റംബൂട്ടാൻ, പുലാസാൻ, മാവ്, ജാതി, തെങ്ങ്, കമുക്, പപ്പായ, കറിവേപ്പ്, അലങ്കാര ചെടികൾ തുടങ്ങിയവയുടെ തൈകളാണ് നശിപ്പിച്ചത്. ഇതിന് ഏകദേശം ഒന്നരലക്ഷം രൂപ വിലമതിക്കും.
ഫാമിൽ കൃഷിചെയ്ത കപ്പ, കൂവ, പപ്പായ, എള്ള്, കാരറ്റ്, ചേന, ചീര, പച്ചക്കറികൾ എന്നിവയും കുത്തിയിളക്കി നശിപ്പിച്ചു. വലിയ മരങ്ങളുടെ ചുവട്ടിലും മരത്തിന്റെ തടയിലും ചുവടുവശത്തും കുത്തി നാശം വരുത്തി. കൃഷിയിടം മുഴുവൻ കുത്തിമറിച്ചിട്ടിരിക്കുകയാണ്. രാത്രി സെക്യൂരിറ്റി ജീവനക്കാരൻ ശബ്ദംകേട്ട് പ്രകാശം തെളിപ്പിച്ച് ഫാമിൽ എത്തിയെങ്കിലും പന്നിക്കൂട്ടം ഓടിയടുത്തതിനാൽ അദ്ദേഹം പരിഭ്രാന്തനായി അടുത്തുള്ള മുറിയിൽ ഓടിക്കയറി. പ്രദേശത്ത് വൈദ്യുതി ഇല്ലാതിരുന്നതിനാൽ ഫാമിലും നഴ്‌സറിയിലും വെളിച്ചം ഉണ്ടായിരുന്നില്ല.കർഷകർക്ക് വൻഭീഷണിയുയർത്തുന്ന കാട്ടുപന്നികളെ തുരത്താൻ വനംവകുപ്പ് അടിയന്തര ശ്രദ്ധ പതിപ്പിക്കണമെന്ന് കൃഷിവിജ്ഞാനകേന്ദ്രം മേധാവി ഡോ. സി.പി.റോബർട്ട് ആവശ്യപ്പെട്ടു.
