കുഞ്ഞുകോശിയിൽ തുടങ്ങി യു.ഡി.എഫ്,റാന്നിയിൽ സജീവമായി എൻ.ഡി.എ.
കുഞ്ഞുകോശിയിൽ തുടങ്ങി യു.ഡി.എഫ്,റാന്നിയിൽ സജീവമായി എൻ.ഡി.എ.
WEB Desk 
പത്തനംതിട്ട : അഞ്ച് മണ്ഡലങ്ങളിൽ നാലിടത്തും മത്സരിക്കുന്നത് നിലവിലെ എം.എൽ.എ.മാർ. ഈ ആനുകൂല്യം പരമാവധി മുതലാക്കുകയാണ് എൽ.ഡി.എഫ്. മണ്ഡലത്തിലെ മുക്കും മൂലയും അറിയാവുന്നതിനാൽ പരിചയങ്ങൾ പുതുക്കിയാണ് സ്ഥാനാർഥികളുടെ പ്രചാരണം.
റാന്നി മണ്ഡലത്തിൽ മാത്രമാണ് എൽ.ഡി.എഫിന് പുതുമുഖമുള്ളത്. മാത്യു ടി.തോമസ് മല്ലപ്പള്ളിയിലും വീണാജോർജ് നാരങ്ങാനത്തും ചിറ്റയം ഗോപകുമാർ അടൂർ നഗരസഭയിലും വോട്ടുതേടി. ജനീഷ് കുമാറിനും പ്രമോദ്‌നാരായണനും ശനിയാഴ്ച കൺവെൻഷൻ ദിവസമായിരുന്നു. ഇങ്ങനെയെങ്കിലും റാന്നിയിലുണ്ടാകുന്ന പുതിയ സംഭവവികാസങ്ങളിൽ മുന്നണിക്കുള്ളിൽ ആശങ്കയുമുണ്ട്.
കുഞ്ഞുകോശി പോളിന്റെ സ്ഥാനാർഥി പ്രഖ്യാപനമെത്തിയതോടെ യു.ഡി.എഫ്. ക്യാമ്പും ഉണർന്നു. സ്ഥാനാർഥി തിരുവല്ലയിലെത്തി പ്രമുഖരേയും മതമേലധ്യക്ഷന്മാരേയും കണ്ടു. മറ്റ് നാല് മണ്ഡലങ്ങളിൽ ഞായറാഴ്ച പ്രഖ്യാപനമുണ്ടാകുമെന്ന പ്രതീക്ഷയിലാണ് യു.ഡി.എഫ്. നേതാക്കൾ. പട്ടിക മാറിമറിയുന്നെന്ന വിവരമെത്തുന്നതിനാൽ പറഞ്ഞുകേട്ട പലപേരുകാരും പ്രവർത്തനം പാതിവഴിയിലാക്കി.
എൻ.ഡി.എ.യുടെ പ്രവർത്തനങ്ങൾ റാന്നി കേന്ദ്രീകരിച്ചാണ് സജീവമായത്. രണ്ടാംതവണ മത്സരിക്കുന്ന മണ്ഡലത്തിൽ കെ.പദ്‌മകുമാർ പഴയബന്ധങ്ങൾ പുതുക്കുന്ന തിരക്കിലായിരുന്നു. ചില സ്വീകരണ പരിപാടികളിലും പങ്കെടുത്തു. മറ്റ് നാല് മണ്ഡലങ്ങളിലെ സ്ഥാനാർഥിത്വം സംബന്ധിച്ച അവ്യക്തത തുടരുകയാണ്. ആറന്മുള മണ്ഡലത്തിൽ ന്യൂനപക്ഷ പിന്തുണ ഉറപ്പിക്കാനാകുന്ന സ്ഥാനാർഥിയുണ്ടാകുമെന്ന പ്രചാരണം സജീവമായിരുന്നു. എന്നാൽ പാർട്ടി നേതാക്കൾ ഇക്കാര്യം സ്ഥിരീകരിക്കുന്നില്ല.
