ചൂട് കനത്തു ഒപ്പം രോഗങ്ങളും
ചൂട് കനത്തു ഒപ്പം രോഗങ്ങളും
WEB Desk 
പത്തനംതിട്ട : വേനൽച്ചൂട് കനത്തതോടെ ജില്ലയുടെ വിവിധ ഭാഗങ്ങളിൽ പകർച്ചവ്യാധികൾ വർധിക്കുന്നു. ശുദ്ധജലലഭ്യത കുറഞ്ഞതോടെ ജലജന്യരോഗങ്ങളും വിവിധയിടങ്ങളിൽ കൂടിവരുന്നുണ്ട്. രണ്ടാഴ്ചയായി ജില്ലയിൽ കനത്തചൂടാണ് അനുഭവപ്പെടുന്നത്. മിക്കദിവസങ്ങളിലും അന്തരീക്ഷ താപനില 32 മുതൽ 34 വരെ ഡിഗ്രി സെൽഷ്യസായി ഉയർന്നു. തിരുവല്ലയിലാകട്ടെ ഇത് 36 ഡിഗ്രി സെൽഷ്യസ് വരെയെത്തി.
ആരോഗ്യവകുപ്പിന്റെ കണക്കനുസരിച്ച് ജനുവരിമുതൽ ഫെബ്രുവരിവരെ ജില്ലയിൽ 66 പേർക്ക് ചിക്കൻപോക്സ് പിടിപെട്ടു. സ്വകാര്യ ആശുപത്രികൾ, ഹോമിയോ ആശുപത്രികൾ എന്നിവിടങ്ങളിൽ ചികിത്സ തേടിയെത്തിയവരുടെ കണക്കുകൾ കൂട്ടാതെയാണിത്. ചൂട് വർധിക്കുന്ന സാഹചര്യത്തിൽ കൂടുതൽ കേസുകൾ റിപ്പോർട്ട് ചെയ്യാനാണ് സാധ്യത. ശുദ്ധജലദൗർലഭ്യം നേരിടുന്ന മേഖലകൾ കേന്ദ്രീകരിച്ച് വയറിളക്കവും റിപ്പോർട്ട് ചെയ്തിട്ടുണ്ട്. ആരോഗ്യവകുപ്പിന്റെ കണക്ക് പ്രകാരം രണ്ടുമാസത്തിനിടെ 596 പേർക്കാണ് വയറിളക്കം പിടിപെട്ടത്. അതോടൊപ്പം ജില്ലയിൽ ഇതുവരെ അഞ്ചുപേരിൽ മഞ്ഞപ്പിത്തവും സ്ഥിരീകരിച്ചിട്ടുണ്ട്. ജലജന്യരോഗങ്ങൾക്ക് പുറമേ മലയോരപ്രദേശങ്ങളിൽ വരട്ടുചൊറി, ചൂടുകുരു തുടങ്ങിയ രോഗങ്ങളും പടരുന്നുണ്ട്. .
മുൻകരുതലുകൾ പേരിൽ മാത്രം
അന്തരീക്ഷ താപനില വർധിച്ചുതുടങ്ങിയ സാഹചര്യത്തിൽ സൂര്യതാപം ഏൽക്കാതെ സൂക്ഷിക്കുന്നതിനുള്ള ജാഗ്രതാ നിർദേശം ആരോഗ്യവകുപ്പ് നൽകിയിരുന്നെങ്കിലും പലയിടത്തും ഇത് പാലിക്കപ്പെടുന്നില്ല. ചൂട് കൂടിയ സാഹചര്യത്തിൽ ഉച്ചസമയത്തുള്ള ജോലികൾ ഒഴിവാക്കണമെന്ന് ലേബർ ഓഫീസർ ഉത്തരവിറക്കിയെങ്കിലും ഇത് പാലിക്കപ്പെടുന്നില്ല. മിക്ക പണിയിടങ്ങളിലും നട്ടുച്ചയ്ക്കുപോലും ആളുകൾ ജോലിയെടുക്കുന്നത് പതിവ് കാഴ്ചയാകുകയാണ്. ജില്ലയിൽ ഇതുവരെ ആർക്കും സൂര്യതാപമേറ്റിട്ടില്ലെങ്കിലും ചൂട് വർധിക്കുന്ന സാഹചര്യത്തിൽ സാധ്യതയേറെയാണ്.
ഭക്ഷണത്തിലും വേണം കരുതൽ
ചൂട് കനത്തതോടെ ചില ഭക്ഷണങ്ങൾ ഒഴിവാക്കണമെന്ന് ആരോഗ്യവകുപ്പ് നിർദേശിച്ചു. മാംസഭക്ഷണങ്ങൾ ഒഴിവാക്കി പച്ചക്കറി ശീലിക്കണം. എണ്ണയും ഉപ്പുള്ളതുമായ ഭക്ഷണങ്ങൾ ഒഴിവാക്കണം. ചായ, കാപ്പി എന്നിവ നിയന്ത്രിക്കുകയും മദ്യം പൂർണമായി വർജിക്കുകയും വേണം. നിത്യേനയുള്ള ഭക്ഷണത്തിൽ ഇലക്കറികൾ കൂടുതലായി ഉപയോഗിക്കുന്നത് ശരീരം തണുപ്പിക്കും.
ചൂടുകാലത്ത് ദാഹം അനുഭവപ്പെട്ടില്ലെങ്കിലും ഓരോ മണിക്കൂറിടവിട്ട് രണ്ടുമുതൽ നാലുവരെ ഗ്ലാസ് വെള്ളം കുടിക്കണം.
