മിന്നുംതാരമായി രാഹുല്‍ഗാന്ധി; പത്തനംതിട്ടയില്‍ ആവേശപ്പൂരം
മിന്നുംതാരമായി രാഹുല്‍ഗാന്ധി; പത്തനംതിട്ടയില്‍ ആവേശപ്പൂരം
WEB Desk 
പത്തനംതിട്ട: പൂരത്തിന്റെ കുടമാറ്റംപോലെ അത്യന്തം ആവേശകരം. ഇരുളിനിടയില്‍ തെളിഞ്ഞ മിന്നല്‍പോലെ പ്രചാരണരംഗത്ത് ഐക്യമുന്നണിക്ക് ഉണര്‍വ്. പ്രമാടം സ്റ്റേഡിയത്തില്‍ ഹെലികോപ്ടറില്‍ വന്നിറങ്ങിയ കോണ്‍ഗ്രസ് നേതാവ് രാഹുല്‍ ഗാന്ധി ജനഹൃദയങ്ങളില്‍ തൊട്ടാണ് തിരിച്ചുപറന്നത്. ജനക്കൂട്ടത്തില്‍ അലിഞ്ഞുള്ള രാഹുലിന്റെ യാത്ര ജില്ലയിലെ നേതാക്കള്‍ക്കും അണികള്‍ക്കും പുത്തനാവേശമായി.
സമയം ശനിയാഴ്ച രാവിലെ 11.10. പ്രവര്‍ത്തകര്‍ കാത്തിരുന്ന നേതാവുമായി ഹെലിക്കോപ്ടര്‍ കോന്നി മണ്ഡലത്തിലെ പ്രമാടത്തേക്ക്. മൈതാനത്തെ പൊടി ഒന്നടങ്ങിയതോടെ കൈകള്‍ വീശി രാഹുല്‍ ഗാന്ധി പുറത്തേക്ക്. ആര്‍പ്പുവിളികളും മുദ്രാവാക്യങ്ങളും ആരവങ്ങള്‍ തീര്‍ത്തു. റോഡ് ഷോയ്ക്കായി ഒരുക്കിയിരുന്ന വാഹനത്തിലേക്ക് രാഹുല്‍ കയറി. എ.ഐ.സി.സി. ജനറല്‍ സെക്രട്ടറി കെ.സി.വേണുഗോപാല്‍ എം.പി., എം.പി.മാരായ ആന്റോ ആന്റണി, അടൂര്‍ പ്രകാശ്, കോന്നിയിലെ സ്ഥാനാര്‍ഥി റോബിന്‍ പീറ്റര്‍ എന്നിവരും ഒപ്പം.
സെല്‍ഫിക്കായി തള്ള്
കുമ്പഴയിലെത്തിയപ്പോള്‍ യൂത്ത് കോണ്‍ഗ്രസ് പ്രവര്‍ത്തകരുടെ പ്രകടനം എതിരേയെത്തി. രാഹുല്‍ ഗാന്ധി സഞ്ചരിച്ച വാഹനത്തിനുചുറ്റും ഇവര്‍ വലയംതീര്‍ത്തു. മിക്കവരും ലക്ഷ്യമിട്ടത് സെല്‍ഫി. കാറിനുള്ളിലേക്കെത്തി കൈകൊടുക്കാന്‍ ചിലര്‍ മുതിര്‍ന്നു. ഈ വലയം ഭേദിക്കാന്‍ സുരക്ഷാ ഉദ്യോഗസ്ഥരും പണിപ്പെട്ടു. വാഹനത്തിനൊപ്പം ത്രിവര്‍ണപതാകയുമായി ഓടിയവരില്‍ ഒരാള്‍ നിലത്തുവീണു.
ആറന്മുള മണ്ഡലത്തില്‍പ്പെട്ട പത്തനംതിട്ടയിലെത്തിയത് സ്ഥാനാര്‍ഥി കെ.ശിവദാസന്‍ നായരെ ഒപ്പം ചേര്‍ത്താണ്. സമയം 12.55. ഗാന്ധിസ്‌ക്വയറിന് സമീപത്തെ വേദിയിലേക്ക് ആള്‍ക്കൂട്ടത്തിനിടയിലൂടെ രാഹുല്‍ നീങ്ങി. കേരളത്തിലെ സമ്പദ്വ്യവസ്ഥ പരിതാപകരമായ നിലയിലാണെന്ന് വ്യക്തമാക്കിയായിരുന്നു സംഭാഷണത്തിന്റെ തുടക്കം. ആര്‍.എസ്.എസിനും ഇടതുപക്ഷത്തിനും വിമര്‍ശനം. മുഖ്യമന്ത്രി കാറല്‍ മാര്‍ക്‌സിന്റെ ഗ്രന്ഥങ്ങള്‍ ഇടയ്ക്കിടെ തുറന്നുനോക്കിയതുകൊണ്ടുമാത്രം സംസ്ഥാനത്ത് ഭരണവണ്ടി ഓടുകയില്ലെന്നും വ്യക്തമാക്കല്‍. നാടിനെ ഭിന്നിപ്പിക്കാനുള്ള രാഷ്ട്രീയമാണ് ബി.ജെ.പി.യും ഇടതുപക്ഷവും പയറ്റുന്നതെന്നാരോപണം. പരിചയസമ്പത്തുള്ള, കരുത്തുറ്റ വ്യക്തിത്വമെന്നായിരുന്നു കെ.ശിവദാസന്‍ നായരെപ്പറ്റിയുള്ള പരാമര്‍ശം. ഈ വാക്യങ്ങളടങ്ങിയ പ്രസംഗം പരിഭാഷപ്പെടുത്തിയതും ശിവദാസന്‍ നായരായിരുന്നുവെന്നതും കൗതുകമായി.
പുഷ്പവൃഷ്ടി
സെന്റ് പീറ്റേഴ്സ് ജങ്ഷന്‍വഴി റാന്നിയിലേക്കുള്ള യാത്രയിലും വരവേല്‍ക്കാന്‍ ജനങ്ങള്‍ കാത്തുനിന്നു. പുഷ്പവൃഷ്ടിയായിരുന്നു പലയിടത്തും. പ്രായമായവര്‍ പൂക്കളുമായി കാത്തുനില്‍ക്കുന്നതുകണ്ട് പലതവണ വാഹനം നിര്‍ത്തിച്ച് ഇവരുടെ സ്വീകരണം ഏറ്റുവാങ്ങി. ഉതിമൂട്ടിലെത്തിയപ്പോള്‍ കളിച്ചെണ്ടയും മാലയുമായി കുരുന്നുകള്‍ ഒരു വീട്ടുമുറ്റത്ത്. ചെണ്ടയില്‍ താളമിട്ട് എതിരേറ്റ കുരുന്നുകളെ അഭിനന്ദിച്ചാണ് രാഹുല്‍ യാത്രതുടര്‍ന്നത്.
റാന്നിയില്‍ ആവേശപ്പൂരം
റാന്നി ഇട്ടിയപ്പാറയിലേക്ക് റോഡ് ഷോ എത്തിയപ്പോള്‍ വന്‍ ജനസഞ്ചയമാണ് ആരവങ്ങളുയര്‍ത്തിയത്. കൈകളില്‍ നിറയെ മൂവര്‍ണബലൂണുകള്‍. ഇതിലൊന്ന് വാങ്ങി രാഹുല്‍ അന്തരീക്ഷത്തിലേക്ക് ഉയര്‍ത്തിവിട്ടു. പാതയുടെ ഇരുപുറവും ആവേശക്കടലിരമ്പി. ഇതിന്റെ പ്രതിഫലനം രാഹുലിന്റെ വാക്കുകളിലും നിറഞ്ഞു. ന്യായ് പദ്ധതിയുടെ ഗുണങ്ങളെക്കുറിച്ച് വിശദമാക്കിയപ്പോള്‍ മറുപടിയായി നിറഞ്ഞ കൈയടി. ഇതാ ഞങ്ങളുടെ യുവസ്ഥാനാര്‍ഥി എന്ന് റിങ്കു ചെറിയാനെ ചൂണ്ടിക്കാട്ടിയപ്പോഴും ഹര്‍ഷാരവം മുഴങ്ങി. ഉച്ചയ്ക്ക് രണ്ടേകാലോടെ റാന്നിയില്‍നിന്ന് റോഡ് ഷോ മുമ്പോട്ടുനീങ്ങി.
മാധ്യമങ്ങള്‍ക്കുവേണ്ടിയും ഇടപെടല്‍
പോലീസ് വാഹനങ്ങളുടെയും സുരക്ഷാസംഘത്തിന്റെയും നീണ്ട വാഹനനിരയ്ക്ക് പിന്നിലായിരുന്നു രാഹുല്‍ ഗാന്ധി സഞ്ചരിച്ച കാര്‍. ഇത് ദൃശ്യമാധ്യമങ്ങള്‍ക്കുള്‍പ്പെടെ തടസ്സമായി.
കോന്നി പിന്നിട്ടപ്പോള്‍ ഇക്കാര്യം മാധ്യമപ്രവര്‍ത്തകര്‍ രാഹുലിന്റെ ശ്രദ്ധയില്‍പ്പെടുത്തി. ഉടന്‍ ഈ തടസ്സം പരിഹരിക്കപ്പെട്ടു. റാന്നിയില്‍നിന്ന് എരുമേലിയിലേക്കായിരുന്നു രാഹുലിന്റെ തുടര്‍യാത്ര. ഇവിടെനിന്ന് ഹെലിക്കോപ്ടര്‍മാര്‍ഗം ഇടുക്കി ജില്ലയിലെത്തി.
