പത്തനംതിട്ട ജില്ലയിലെ യു ഡി എഫ് സ്ഥാനാർത്ഥികൾ

അടൂർ - യു ഡി എഫ് 
എം.ജി. കണ്ണൻ 

നിലവിൽ യൂത്ത് കോൺഗ്രസ് പത്തനംതിട്ട ജില്ലാ പ്രസിഡന്റ്. രണ്ടു തവണ ജില്ലാ പഞ്ചായത്തംഗമായി തിരഞ്ഞെടുക്കപ്പെട്ടു. 23-ാം വയസ്സിൽ ചെന്നീർക്കര ഗ്രാമപ്പഞ്ചായത്തംഗമായും തിരഞ്ഞെടുക്കപ്പെട്ടിട്ടുണ്ട്. 
വിദ്യാർഥി രാഷ്ട്രീയത്തിലൂടെയാണ് പൊതുപ്രവർത്തന രംഗത്തേക്കെത്തിയത്. ഡി.സി.സി. ജനറൽ സെക്രട്ടറിയായും പ്രവർത്തിച്ചു. അങ്ങാടി, ഇലന്തൂർ ഡിവിഷനുകളെയാണ് ജില്ലാ പഞ്ചായത്തിൽ പ്രതിനിധീകരിച്ചത്. 28-ാം വയസ്സിലാണ് ഇലന്തൂർ ഡിവിഷനിൽ വിജയം നേടിയത്. ബി.എ. ബിരുദധാരിയാണ്.

ആറന്മുള- യു.ഡി.എഫ്.
കെ.ശിവദാസൻനായർ

ആറന്മുളയിൽ അഡ്വ. കെ.ശിവദാസൻനായർ ആറന്മുളയിൽ യു.ഡി.എഫ് സ്ഥാനാർഥി. ഇത് നാലാമങ്കം. കേരള സർവകലാശാല യൂണിയൻ ചെയർമാനും കെ.എസ്.യു. സംസ്ഥാന നേതാവുമായിരുന്നു. 2001-ൽ തിരഞ്ഞെടുപ്പ് പ്രചാരണം ആരംഭിച്ച് ചുവരെഴുത്തും പോസ്റ്റർ ഒട്ടിക്കലും നടത്തി. കെ.കരുണാകരൻ പാർട്ടിയിൽ ഉയർത്തിയ കലാപത്തെ തുടർന്ന് പിൻവാങ്ങി. 2006-ൽ ആറന്മുളയിൽ മത്സരിക്കാൻ അനുമതി നൽകി. കരുണാകരന്റെ ഡി.ഐ.സി.ക്ക് സീറ്റ് നൽകിയതോടെ വീണ്ടും തഴയപ്പെട്ടു. പത്തനംതിട്ടയിൽ സീറ്റ് നൽകി. സി.പി.എമ്മിലെ വി.കെ.പുരുഷോത്തമൻപിള്ളയെ പരാജയപ്പെടുത്തി . 2011-ൽ ആറന്മുളയിൽ സി.പി.എമ്മിലെ കെ.സി.രാജഗോപാലിനെ പരാജയപ്പെടുത്തി രണ്ടാം വിജയം . 2016-ൽ എൽ.ഡി.എഫ്. സ്ഥാനാർഥി വീണാ ജോർജിനോട് പരാജയപ്പെട്ടു. 

കോന്നി യു ഡി എഫ് 
റോബിൻ പീറ്റർ

നിലവിൽ ജില്ലാ പഞ്ചായത്തംഗം. ഡി.സി.സി. വൈസ് പ്രസിഡന്റ്. കഴിഞ്ഞ തവണ കോന്നി ഉപതിരഞ്ഞെടുപ്പിൽ സ്ഥാനാർഥിയായി പരിഗണിക്കപ്പെട്ടിരുന്നു. പ്രമാടം ഗ്രാമപ്പഞ്ചായത്തംഗം, വൈസ് പ്രസിഡന്റ്, പ്രസിഡന്റ്, കോന്നി ബ്ലോക്ക് പഞ്ചായത്ത് പ്രസിഡന്റ് എന്നീ നിലകളിൽ പ്രവർത്തിച്ചു.
പത്തനംതിട്ട കാതോലിക്കറ്റ് കോളേജ് യൂണിയൻ ചെയർമാൻ, കെ.എസ്.യു. ജില്ലാ ജനറൽ സെക്രട്ടറി, യൂത്ത് കോൺഗ്രസ് ജില്ലാ ജനറൽ സെക്രട്ടറി പദവികൾ വഹിച്ചിട്ടുണ്ട്. കോന്നി കാർഷിക ഗ്രാമീണ സഹകരണസംഘത്തിന്റെ പ്രസിഡന്റാണ്. ജില്ലാ പഞ്ചായത്തിൽ പ്രമാടം ഡിവിഷനെയാണ് പ്രതിനിധീകരിക്കുന്നത്.

റാന്നി - യു ഡി എഫ് 
റിങ്കു ചെറിയാൻ

തിരഞ്ഞെടുപ്പിൽ പുതുമുഖം. എന്നാൽ, മണ്ഡലത്തിൽ സുപരിചിതൻ. നിയമസഭയിൽ രണ്ടുതവണ റാന്നിയെ പ്രതിനിധീകരിച്ച എം.സി.ചെറിയാന്റെ മകൻ. യൂത്ത് കോൺഗ്രസിൽ പ്രവർത്തനം തുടങ്ങിയ റിങ്കു ഇപ്പോൾ കെ.പി.സി.സി. സെക്രട്ടറി. കഴിഞ്ഞ തിരഞ്ഞെടുപ്പിൽ സ്ഥാനാർഥിയായിരുന്ന അമ്മ മറിയാമ്മ ചെറിയാന് കഴിയാതിരുന്നതാണ് ഇക്കുറി മകനിലൂടെ നേടിയെടുക്കാൻ യു.ഡി.എഫ്. ശ്രമിക്കുന്നത്.
ഈ പ്രതീക്ഷയോടെയാണ് റാന്നി മൂഴിക്കൽ കുടുംബാംഗത്തിനെത്തന്നെ സ്ഥാനാർഥിയാക്കിയത്. മദ്രാസ് ക്രിസ്ത്യൻ കോളേജിൽനിന്ന്‌ ബിസിനസ് അഡ്മിനിസ്‌ട്രേഷനിൽ ബിരുദാനന്തര ബിരുദം നേടി. യൂത്ത് കോൺഗ്രസിൽ സജീവമായതിനെ തുടർന്ന് സംസ്ഥാന ജനറൽ സെക്രട്ടറി, വൈസ് പ്രസിഡന്റ് സ്ഥാനങ്ങളിൽവരെ എത്തി. ആദ്യമായാണ് തിരഞ്ഞെടുപ്പിൽ മത്സരിക്കുന്നത്.

തിരുവല്ല യു ഡി എഫ് 

കുഞ്ഞുകോശി പോള്‍ 

കേരള കോണ്‍ഗ്രസ് ജോസഫ് വിഭാഗം ഉന്നതാധികാര സമിതിയംഗം. നിയമസഭയിലേക്ക് കന്നിയങ്കം. പ്രഥമ പത്തനംതിട്ട ജില്ലാ കൗണ്‍സില്‍ അംഗം. മല്ലപ്പള്ളി ഗ്രാമപ്പഞ്ചായത്ത് പ്രസിഡന്റ്, വൈസ് പ്രസിഡന്റ്, ബ്ലോക്ക് പഞ്ചായത്ത് വൈസ് പ്രസിഡന്റ്, ഓര്‍ത്തഡോക്‌സ് യുവജനപ്രസ്ഥാനം ഓര്‍ഗനൈസര്‍ എന്നീ നിലകളില്‍ പ്രവര്‍ത്തിച്ചിട്ടുണ്ട്. കേരള യൂത്ത് ഫ്രണ്ട് സംസ്ഥാന ജനറല്‍ സെക്രട്ടറിയും പ്രസിഡന്റും ആയിരുന്നു. ഹൗസിങ് കോ-ഓപ്പറേറ്റീവ് സൊസൈറ്റി ഡയറക്ടറാണ്. ബി.കോം. ബിരുദധാരിയാണ്.