വാക്സിന് കടുത്ത ക്ഷാമം
വാക്സിന് കടുത്ത ക്ഷാമം
admin 
പത്തനംതിട്ട : മെഗാവാക്സിനേഷൻ ക്യാമ്പുകൾ ആരംഭിക്കാനിരിക്കേ ജില്ലയിൽ കോവിഡ് വാക്സിന് കടുത്തക്ഷാമം. ആകെ 14,000 ഡോസ് വാക്സിൻ കൂടി മാത്രമാണ് ജില്ലയിൽ സ്റ്റോക്കുള്ളത്. ഞായറാഴ്ച ലഭിച്ച 5000 ഡോസ് കൂടി ചേർത്താണിത്. തിങ്കളാഴ്ച കൂടി നൽകാനുള്ള വാക്സിൻ മാത്രമാണ് ഇപ്പോൾ ജില്ലയുടെ ശേഖരത്തിലുള്ളത്.
ജില്ലയിൽ പ്രതിദിനം 15,000 പേർക്ക് വീതമാണ് വാക്സിനേഷൻ നൽകിവരുന്നത്. വാക്സിൻ ക്ഷാമം അനുഭവപ്പെട്ടതോടെ പകുതിയിലധികം ക്യാമ്പുകളും ഇപ്പോൾ ആരോഗ്യവകുപ്പ് നിർത്തിവെച്ചിരിക്കുകയാണ്.
50, 100, 200 എന്നീ അംഗസഖ്യയിലുളള ക്യാമ്പുകൾ മാത്രമാണ് ഇപ്പോൾ നടത്തുന്നത്. കൂടുതലൽ വാക്സിനെത്തിയില്ലെങ്കിൽ ചൊവ്വാഴ്ചയോടെ ഇതും നിലയ്ക്കാനാണ് സാധ്യത. നേരത്തെ വാക്സിൻ ക്ഷാമം അനുഭവപ്പെട്ടു തുടങ്ങിയ സാഹചര്യത്തിൽ തന്നെ 75,000 കോവീഷീൽഡും, 10,000 കോവാക്സിനും ആരോഗ്യവകുപ്പ് അധികൃതർ ആവശ്യപ്പെട്ടിരുന്നു. എന്നാൽ ശനി, ഞായർ ദിവസങ്ങളിലായി 15,000 ഡോസ് മാത്രമാണ് ജില്ലയ്ക്ക് ലഭിച്ചത്. ഞായറാഴ്ച വിതരണം ചെയ്ത 2.52 ലക്ഷം വാക്സിനിൽ പത്തനംതിട്ടയ്ക്ക് മാത്രമാണ് ഏറ്റവും കുറവ് ലഭിച്ചത്.
മറ്റ് ജില്ലകൾക്കെല്ലാം 30,000 മുതൽ 10,000 വരെ ലഭിക്കുകയും ചെയ്തു. കോവിഡിന്റെ തരംഗം ആരംഭിക്കുന്നതിന് മുന്നേ തന്നെ വാക്സിനേഷന് മുന്നിലായിരുന്നു ജില്ല. എന്നാൽ, വാക്സിന്റെ ലഭ്യത കുറഞ്ഞതോടെ ക്യാമ്പുകളെല്ലാം പ്രതിസന്ധിയിലായി.
വാക്ക് വിത്ത് വാക്സിൻ കാമ്പയിൻ ആരംഭിച്ചു
കോവിഡ് കേസുകൾ ഉയർന്ന സാഹചര്യത്തിൽ തദ്ദേശസ്ഥാപനങ്ങളുടെയും, ആരോഗ്യവകുപ്പിന്റെയും സഹകരണത്തോടെ കുടുംബശ്രീയുടെ നേതൃത്വത്തിൽ ജില്ലയിൽ വാക്ക് വിത്ത് വാക്സിൻ കാമ്പയിൻ ആരംഭിച്ചു.
ജില്ലയിലെ 53 ഗ്രാമപ്പഞ്ചായത്തുകളിലും നാലുനഗരസഭകളിലും 45 വയസ്സിന് മുകളിൽ വാക്സിനേഷൻ എടുക്കാത്ത മുഴുവൻ വ്യക്തികളുടെയും വിവരശേഖരണം നടത്തുന്നതിനായി സംഘടിപ്പിച്ചതാണിത്. 45 വയസ്സിന് മുകളിൽ പ്രായമുള്ളതും നാളിതുവരെ വാക്സിനെടുക്കാത്തതുമായ മുഴുവൻ ആളുകളുടേയും പേര്, അഡ്രസ്, തദ്ദേശ ഭരണസ്ഥാപനം, വാർഡ്, ആധാർ നമ്പർ, ആധാറുമായി ലിങ്ക്ചെയ്ത ഫോൺ നമ്പർ, ഓപ്ഷണൽ ഫോൺ നമ്പർ എന്നീ വിവരങ്ങളാണ് ശേഖരിക്കുന്നത്. വിവരങ്ങൾ അതാത് ആരോഗ്യകേന്ദ്രത്തിനും ജില്ലാ ആരോഗ്യ കേന്ദ്രത്തിനും ജില്ലാ ഭരണകൂടത്തിനും കൈമാറും.
